مَن جعلك مجرماً ؟
توجد عشرات الأديان فى العالم ...
وكل واحد من أصحاب هذه الديانات يؤمن أن دينه على حق .
حتى الأن لا توجد مشكلة ...
ولكن تبدأ المشكلة عندما يحكم أحدهم على دين الأخر بأنه باطل و أن صاحبه كافر
وتكتمل فصول المأساة بلزوم قتاله و قتله !!
اندهشت جداً وأنا أتابع البرنامج الذى تم فيه التحريض على البهائيين 0
قال لها وهى تجلس أمامه فى برنامج تلفزيونى : أنت كافرة !! مرتدة !! لازم تموتى !!
أنتم لازم يقبضوا عليكم و يحبسوكم و يقتلوكم !!!
لا أذكر إسم ذلك الشخص ، ولكنه للأسف يمثل الغالبية فى بلدنا الغالية مصر 00
بأه سهل أوى أنك تقول لواحد مش من دينك أنت كافر 00
وفى نظرك ممكن تقتله !!!
إن كنت تؤمن أن دينك صحيح فهنيئاً لك يا أخى 00
ولكن لماذا تريد قتل اللى دينه غير صحيح ؟!
و المصيبة إن ممكن الطرف الثانى يشوف نفس الحكاية وتولع الدنيا 000
وإن كنت مفترى فى بلد معين علشان شايف نفسك أغلبية ففى بلاد كثيرة ممكن أتباع نفس الدين بتاعك يكونوا أقلية و يتعمل فيهم اللى أنت بتعمله و أكثر 00 ( إزاى الحال ؟ )
دى مش طريقة يعيش بيها البنى آدميين !!!
ما تستسهلش قتل الناس و تكفيرهم 000
لأن التاريخ بيقول أنه بييجى اليوم اللى غيرك يكفرك و يقتلك 000
تذكروا ماذا حدث فى أفغانستان بعد إنتهاء الإحتلال السوفيتى 000
إذا كان دينك بيحرضك على التكفير و القـتل فـلابد أن تراجع الـدين اللى عـاوز يعمـل منك قاتل ومجرم 000
أفكار التكفير و القتل تملأ الجرائد و الإعلام و شوارع العراق و أفغانستان و التاريخ الإسلامى ملىء بها 000
إرجع لقضية البهائيين و البرنامج إياه 000
تكلم حامى حمى الدين بثقة شديدة
أنتِ كافرة 00 مرتدة 00 لازم تموتى !!
هى حياة الناس رخيصة أوى كده ؟! 00 يا سلام !!
يا ترى منين جاب الثقة دى كلها ؟
إيه اللى خلا قلبه جامد كده وهو بيهدد الناس دى بالقتل ؟؟
ليه دعوته لقيت صدى واسع من أهل قرية الشورانية وقاموا يطهروا بلدهم من أى حد مش بيدين بدين الحق ؟؟
كلمة أريد أن أقولها وياريت تلاقى صدى فى ضمير كل واحد بيسمعنى و ما يبقاش مجرد كلام 00
حياة الإنسان حاجة غالية أوى
ودى هبة من ربنا وحده
ومش سهل إن الواحد يّموت غيره
أوعى تكون بتقول إن من قتل نفساً بغير حق كأنما قتل الناس جميعاً و أنت مــاسك سيــف التكفـير و إيديك مليانة بالدم 000
أوعى تسمح لحد يخليك مجرم و قاتل حتى لو كان الحد ده هو دين الحق !!
العابرة لنور المسيح
رشا نور
10 / 4 / 2009
رشا نور
